សកម្មភាពគណបក្ស ខេត្តបាត់ដំបង ពីថ្ងៃទី១៨-២០ ខែ កុម្ភះ ឆ្នាំ ២០១២ !!!

ដោយឈរលើផែនការ នៃការរៀបចំបេក្ខភាព ក្រុមប្រឹក្សា ឃុំ សង្កាត់ សំរាប់ការបោះឆ្នោត អាណត្តិទី៣ ឆ្នាំ២០១២ នេះ ថ្នាក់ដឹកនាំ ក្រុមប្រឹក្សាគណបក្ស ខេត្តបាត់ដំបង បាន ចុះរៀប ចំតាមស្រុក ក្រុង ជារៀងរាល់ថ្ងៃ។ យ៉ាងណាមិញ នៅថ្ងៃទី ១៨ វេលាម៉ោង ០៩ព្រឹក ចុះរៀបចំ នៅក្រុង បាត់ដំបង ទទួលបាន បេក្ខភាព សរុប ២០៩នាក់ នៅម៉ោង ១៤ល្ងាច នៅស្រុកឯកភ្នំ ទទួលបានបេក្ខភាព សរុប ៧៣ នាក់ និងថ្ងៃទី១៩ ម៉ោង០៩ព្រឹក លោក សុវណ្ណា ពីសាខា អនុប្រធាន ក្រុមប្រឹក្សាគណបក្សខេត្ត និងលោក ជា ជីវ ហិរញ្ញិក ក្រុមប្រឹក្សាគណបក្សខេត្ត ចុះរៀបចំ នៅស្រុកថ្ម គោល ទទួលបាន បេក្ខភាពសរុប ២១៦នាក់ និងនៅថ្ងៃទី ២០ ម៉ោង០៩ព្រឹក លោក សុវណ្ណា ពីសាខា អនុប្រធាន ក្រុមប្រឹក្សាគណបក្សខេត្ត និងលោក ជា ជីវ ហិរញ្ញិក ក្រុមប្រឹក្សាគណបក្សខេត្ត ចុះរៀបចំ នៅស្រុកសង្កៃ ទទួល បាន បេក្ខភាពសរុប ២០០នាក់។

សរុប មកដល់ថ្ងៃនេះ ក្រុមប្រឹក្សាគណបក្ស ខេត្តបាត់ដំបង រៀបចំបេក្ខភាព បាន៩០ភាគរយ ហើយ។ ប៉ុន្តែ យើងនៅ ធ្វើការត្រួតពិនិត្យ ឯកសារគតិយុត្តមួយចំនួនទៀត ទៅ តាមការណែនាំ របស់គណៈកម្មាធិការ ជាតិរៀបចំ ការ បោះឆ្នោត។ តែទោះជាយ៉ាងណា ក៏យើងអាចធ្វើការ វាយ តម្លៃបានថា ការរៀបចំបញ្ជីបេក្ខភាព ក្រុមប្រឹក្សាឃុំ សង្កាត់ នៅខេត្តបត់ដំបង នឹងមាននៅគ្រប់ឃុំ សង្កាត់ ទាំង ១០២ នៅទូទាំងខេត្ត។

ទោះជាយ៉ាងណាក៏ដោយ ក៏ថ្នាក់ដឹកនាំ ក្រុមប្រឹក្សាគណ បក្ស ខេត្តបាត់ដំបង នៅតែបន្តចុះធ្វើសកម្មភាព ជាក់ស្តែង ជាបន្តបន្ទាប់ ទៅតាមផែនការ របស់គណបក្ស ដើម្បីឲ្យ គណបក្ស ទទួលបាន ជ័យជំនះ ក្នុងការបោះឆ្នោត ជ្រើស រើស សមាជិកក្រុមប្រឹក្សា ឃុំ សង្កាត់ នៅថ្ងៃទី ០៣ ខែ មិថុនា ឆ្នាំ ២០១២ ខាងមុននេះ។ សកម្មភាព ដែលយើង ត្រូវបន្តអនុវត្ត មាន ៖ ការរៀបចំជ្រើសរើស ភ្នាក់ងារសង្កេតការណ៏ គណបក្ស, ការចុះពង្រឹងសមត្ថភាព បេក្ខភាព និងភ្នាក់ងារគណបក្ស, និងការចុះប្រជុំបហាជន ។ល។ និង។ល។៕

ការរៀបចំបេក្ខភាពក្រុមប្រឹក្សាឃុំ នៅស្រុករុក្ខគីរី, មោង និងគាស់ក្រឡ!

នៅថ្ងៃទី ១៦ ខែ កុម្ភះ ឆ្នាំ ២០១២ លោក សោ ចាន់ដេត អនុប្រធានក្រុមប្រឹក្សា គណបក្ស ខេត្ត បាត់ដំបង និងសហការី បានចុះទៅរៀបចំ បេក្ខភាព ក្រុមប្រឹក្សាឃុំ នៅស្រុករុក្ខគីរី, ស្រុកមោងឫស្សី និង ស្រុកគាស់ក្រឡ ដោយមានបេក្ខភាព ដាក់ពាក្យសុំ ឈរឈ្មោះមាន ៖ ស្រុករុក្ខគីរី ១០០នាក់, ស្រុកមោង ឫស្សី ២៤៨នាក់ និងស្រុកគាស់ក្រឡ ៧០នាក់។

នៅថ្ងៃទី ១៧ ខែ កុម្ភះ ឆ្នាំ ២០១២ អ្នកតំណាងរាស្រ្ត មូរ សុខហួរ ប្រធានគណបក្ស ខេត្តបាត់ដមបង និង សហការី បានចុះទៅរៀបចំ បេក្ខភាព នៅស្រុក បវេល ដែលមាន បេក្ខភាព ដាក់ពាក្យសុំឈរឈ្មោះ ចំនួន ១៦៣នាក់ រីឯលោក ប៉ែន ឈុនសារ៉ាវ័ន្ត ប្រ ធានក្រុមទ្រទ្រង់ ក្រុមប្រឹក្សាគណបក្ស ស្រុករតនមណ្ឌល បានចុះទៅរៀបចំ នៅស្រុករតនមណ្ឌល ដែលមាន សមាជិក ដាក់ពាក្យឈរឈ្មោះ ចំនួន ៧៣នាក់។ ដោយកាល ពីថ្ងៃទី ៣ ដល់ ថ្ងៃទី ១៣ ខែ កុម្ភះ ឆ្នាំ ២០១២ លោក ឌឹម សារឿន ប្រធានក្រុមការងារ ស្រុកសំឡូត បានចុះទៅរៀបចំ នៅស្រុកសំឡូត ដែលទទួលបាន បេក្ខភាព ចំនួន ៧៦នាក់។

សរុបសេចក្តីមក ស្រុកទាំង ៦ខាងលើ គឺបានរៀបចំ បេក្ខភាព បានគ្រប់ចំនួន ត្រឹមត្រូវ គ្រប់ឃុំ ទាំងអស់ ទៅតាមផែនការ របស់គណបក្ស ដាក់មក។ មិនតែ ប៉ុណ្ណោះ គឺថែមទាំង មានសមាសភាព គ្រប់វ័យ នៃ ភេទ ទាំងពីរ បានលាយចូល ជារបាយ ទាំងអស់ នៃ ឃុំនីមួយៗ។ មានន័យថា មានទាំងកំលាំងមនុស្សន ចាស់ ទាំងកំលាំងយុវជន និងកំលាំងចលនាស្រ្តី បាន ចូលមក ឈរឈ្មោះជាមួយ គណបក្ស សម រង្ស៊ី ប្រ កបដោយ ភាពអង់អាច ក្លាហានបំផុត។

សកម្មភាព នៃការរៀបចំ កំលាំងមូលដ្ឋាននេះ បាន បង្ហាញ ពីភាពខ្លាំង របស់គណបក្ស សម រង្ស៊ី នៅ មូល ដែលកំពុងតែ មានប្រៀបជាមួយ គណបក្ស ប្រជាជនកម្ពុជា។ សកម្មភាពនេះ ជាសញ្ញាបញ្ជាក់ ថា គណបក្ស សម រង្ស៊ី នឹងទទួលបាន ជ័យជំនះ នាការ បោះឆ្នោត ខាងមុខៗនេះ យ៉ាងពិតប្រាកដ។ បើដូច្នេះ មែន ប្រជាពរដ្ឋ កម្ពុជាយើង ក៏ដូចសង្គមជាតិ យើង ទាំងមូល ច្បាស់ជាមានសង្ឃឹមថា នឹងទទួលបាន អភិវឌ្ឍន៏ ពិតប្រាកដ ប្រកបដោយ ប្រសិទ្ធិភាព ដូច ប្រទេសជាតិ ដទៃទៀត ជាក់ជាមិនខាន។

មានន័យថា “ជ័យជំនះ គណបក្ស សម រង្ស៊ី គឺជា ជ័យជំនះ របស់ប្រទេសជាតិខ្មែរ ទាំងមូល និង ជ័យជំនះ ប្រទេសខ្មែរ គឺជាជ័យជំនះ របស់ប្រជា ពលរដ្ឋខ្មែរ ទាំងអស់គ្នា”។

ការចុះរៀបចំបេក្ខភាពក្រុមប្រឹក្សាឃុំ នៅស្រុកសំពៅលូន ភ្នំព្រឹក និងកំរៀង!!

នៅថ្ងៃទី១៥ ខែកុម្ភះ ឆ្នាំ២០១២ លោក សោ ចាន់ដេត អនុ ប្រធាន ក្រុមប្រឹក្សាខេត្តបាត់ដំបង និង សហការី បាន ចុះ ទៅ រៀបចំបេក្ខភាព ក្រុមប្រឹក្សាឃុំ នៅស្រុក សំលូន, ស្រុក ភ្នំព្រឹក និងស្រុកកំរៀង ដោយមាន បេក្ខភាព ដាក់ពាក្យ ឈរឈ្មោះ នៅស្រុកសំពៅលូន មាន  ៧៨នាក់, ស្រុក ភ្នំព្រឹក មាន ៦៧នាក់ និងស្រុក កំរៀង មាន ៧៦នាក់។ បេក្ខភាព នៅក្នុងស្រុក ទាំងបី ខាងលើ សុទ្ធតែបានបំពេញ ឯកសារ ទៅតាមការ ណែនាំ របស់គណៈកម្មការ រៀបចំ ការបោះឆ្នោត ទាំងអស់ ដូចជា ការបំពេញឯកសារ ប្រវត្ត រូបសង្ខេប ដោយខ្លួនឯង ដែលមានភ្ជាប់ រូបថតចំនួន ៥ សន្លឹក ដែលមួយសន្លឹក ទុកសំរាប់បិត ក្នុងប្រវត្តរូបជូនមក គណបក្ស ។ ប៉ុន្តែអ្វីដែលគួឲ្យធ្វើគត់សំគាល់នៅពេលនេះ សំរាប់គណបក្ស សម រង្ស៊ី គឺយើងសង្កេតឃើញ ថា ទាំងថ្នាក់ដឹកនាំ គណបក្ស មូលដ្ឋាន និងអ្នកគាំទ្រ មានសភាពស្វាហាប់ ជាងពេលណាៗទាំងអស់។

សកម្មភាពគណបក្ស សម រង្ស៊ី មូលដ្ឋាន នៅពេល នេះ គឺបានបង្ហាញ អំពី សន្ទុះនៃការគាំទ្រ គណបក្ស សម រង្ស៊ី នៅមូលដ្ឋាន មានការកើនឡើង យ៉ាងខ្លាំង រហូត មានភាពប្រាកដនិយមថា “គណបក្ស សម រង្ស៊ី នឹងទទួលបាន ជ័យជំនះ ក្នុងការបោះឆ្នោត នាពេលខាងមុខៗនេះ។

លោក សោ ចាន់ដេត ក្នុងនាមថ្នាក់ដឹកនាំគណបក្ស ខេត្តបាត់ដំបង បានសំដែងនូវ ការកោតសរសើរ ចំពោះ ថ្នាក់ដឹកនាំ គណបក្ស នៅមូលដ្ឋាន ដែលបាន ខិតខំ បំពេញការងារ ជូនគណបក្ស ក៏ដូចជា ការបំ ពេញ កាតព្វកិច្ច ដើម្បីជាតិ មាតុភូមិ ប្រកបដោយ ជោគជ័យ យ៉ាងត្រចេះត្រចង់។ មានន័យថា តំបន់ អតីតអ្នកតស៊ូ ដាច់ស្រយ៉ាលទាំងបីនេះ បានរៀបចំឲ្យមាន បេក្ខភាព ឈរឈ្មោះបោះឆ្នោត ជ្រើសរើស ក្រុម ប្រឹក្សា សង្កាត់ អាណត្តិទី៣ ឆ្នាំ២០១២ នេះ បានគ្រប់ឃុំទាំងអស់ នៃស្រុកបីនេះ។ ទាំងអស់នេះ ក៏ដោយសារ តែកំលាំងអ្នកតស៊ូ ទាំងអស់បាន យល់យ៉ាងច្បាស់ថា “មានតែគណបក្ស សម រង្ស៊ី មួយគត់ ដែលជា ជម្រើស សម្រាប់ប្រជាជាតិ កម្ពុជាយើងទាំងមូល”៕

ភាពគ្មានការងារធ្វើរបស់យុវជនកម្ពុជាសព្វថ្ងៃ កំពុងចោទជាបញ្ហា …!!!

បើនិយាយ អំពីការខ្វះការងារធ្វើ សំរាប់កម្ពុជាយើង ដែល ដឹកនាំដោយលោក ហ៊ុន សែន គឺពុំមានអ្វីគួឲ្យ មានការ ភ្ញាក់ផ្អើលឡើយនោះទេ ព្រោះនៅគ្រប់តំបន់ នៃ ប្រទេសកម្ពុជា ទាំងអស់សុទ្ធតែ ត្រូវបានយើង មើលឃើញថា មានយុវជនកម្ពុជា ជាច្រើនរស់នៅ ពាសពេញភូមិ ឃុំ/សង្កាត់ ស្រុក/ ក្រុង/ខ័ណ្ឌ ដោយ គ្មានការងារធ្វើ ដែលធ្វើឲ្យពួកគេ នាំគ្នាដើរលេង ទាំង ពុំដឹង អំពីវាសនាអនាគត់របស់ពួកថា នឹងទៅជាយ៉ាង នាពេលអនាគត់ខាងមុខនោះឡើយ។

ប៉ុន្តែ ចំពោះប្អូនៗយុវជន នៅស្រុកស្រែ ចំការ ដែល ស្ថានភាព គ្រួសាររបស់ ពួកគេក្រីក្រ គឺប្អូនៗយុវជន កម្ពុជាយើង មួយចំនួន បានធ្វើដំណើរចល័ត ពីស្រុក មួយ ទៅស្រុកមួយ ឫភាសខ្លួន ទៅប្រទេស ជិតខាង ដើម្បីស្វែងរក របរស៊ីឈ្នួលគេ ដោយទទួលបាន ផលកំរ៉ៃ បន្តិចបន្តូច យកមកចិញ្ចឹម គ្រួសារដ៏ក្រីក្រ របស់ពួកគេ។

ជាក់ស្តែង ទិដ្ឋភាព នៃរូបភាព ជិះឡាន ដ៏ចង្អៀតនេះ វាគ្រាន់តែ ជាសកម្មភាព ធម្មតាមួយ នៅក្នុងទឹកដី ខេត្តបាត់ដំបង ដែលជាខេត្ត មួយធ្លាប់ មានឈ្មោះ ល្បីថា ជាខេត្តសំបូរ ទៅដោយ ផលិតផល កសិកម្ម ពិសេស ស្រូវ អង្ករ តែផ្ទុយទៅវិញ សព្វថ្ងៃនេះ មាន ពលរដ្ឋ នៅខេត្តបាត់ដំបង ជាច្រើន រស់នៅដោយ ខ្វះអង្ករហូប ក៏ដោយសារតែ ពួកគាត់គ្មាន ដីស្រែធ្វើ។

មកដល់ករណី យុវជនកម្ពុជា ខ្វះការងារនេះ វាជារឿងគួ ឲ្យអៀនខ្មាសបំផុត សំរាប់ប្រជាជាតិ កម្ពុជាយើង ព្រោះ ទឹកដី នៃមាតុភូមិយើង ជាទឹកដីដែលមាន លក្ខណៈអនុ គ្រោះពីធម្មជាតិ យ៉ាងខ្លាំង នេះបើយើងធ្វើការ ប្រៀប ធៀបជាមួយប្រទេស នៅជិកខាងយើង ក៏ដូចប្រទេសជាតិ ជឿនលឿន ដ៏ទៃទៀតនៅលើពិភពលោកយើងនេះ ហើយបើយើងនិយាយ ពីមរតកដែលដូនតា កាលពីសម័យ អង្គរបន្សល់ទុកឲ្យវិញ ក៏មានតម្លៃច្រើនយ៉ាងសន្ធឹកសន្ធាប់ណាស់ណាដែរ ចំណែកឯដង់ស៊ីតេ ប្រជាពលរដ្ឋ ក៏នៅ មានចំនួនតិចជាង ប្រទេសជឿនលឿនដទៃទៀតដែរ និងភាពឈ្លាសវៃ និងការតស៊ូរបស់ប្រជាពលរដ្ឋ កម្ពុជាយើង ក៏មិនចាញ់ជាតិសាស្រ្តដទៃក៏ទេដែរ។ បើអញ្ចឹងចុះហេតុអីទៅ បានជាប្រជាតិកម្ពុជាយើង រងគ្រោះ វេទនាម្លេះ?? បាទចម្លើយ : ឆ្លើយថា សង្គមកម្ពុជាយើង ខ្វះតែមេដឹកនាំល្អតែមួយនាក់គត់ !!!!!៕

គណបក្សចំនួនបី ជាសាវ័ករបស់គណបក្ស ប្រជាជនកម្ពុជា !!!

ពាក្យថា “សាវ័ក” បើនិយាយតាមវចនានុក្រម ខ្មែរ មានន័យថា អ្នកដែល ចេះស្តាប់តាម ឪវាទនរណាម្នាក់ ឬតាមក្រុមណាមួយ ដែលជាគ្រូរបស់ ខ្លួន ឬជាអ្នក ដែលបានបង្កើតខ្លួនមក ឬក៏ជាក្រុម មនុស្សដែលបានស៊ី ឈ្នួលឲ្យ ក្រុមមនុស្ស ណាមួយ ។ បើដូច្នេះ តើគណបក្ស ចំនួន៣ (គណបក្ស នរោត្តមរណឬទ្ធិ, គណបក្ស ហ៊្វុន ស៊ិនប៉ិច និងគណបក្ស សិទ្ធិមនុស្ស កឹម សុខា) ដែលកំពុងតែធ្វើសកម្មភាព ក្នុងន័យ បំបែកកម្លាំងប្រជា ធិបតេយ្យ និងកំលាំង អ្នកស្នេហាជាតិនោះ វាពិតជាសាវ័ករបស់ គណបក្ស ប្រជាជនកម្ពុជាមែនឬ? បើមែន តើមានអ្វីជាការបង្ហាញថា សកម្មភាពរបស់ គណបក្ស ទាំង៣នេះ ធ្វើសកម្មភាព បម្រើ គណបក្សប្រជាជនកម្ពុជា ? ។

មនុស្សទាំងឡាយណា ដែលបានតាមដានប្រវត្តិសាស្ត្រកម្ពុជា ឬក៏គ្រាន់តែ សាកល្បង គិតមើលបន្តិច គឺច្បាស់ជាមើលឃើញ យ៉ាងច្បាស់ថា “គណបក្ស ប្រជាជនកម្ពុជា” ជាគណបក្ស ដែលយួនហូជីមិញ បង្កើតមក ដើម្បីគ្រប់គ្រង ប្រជាជាតិកម្ពុជា ។ មានន័យថា គណបក្សប្រជាជនកម្ពុជា ជាគណបក្ស ដែលយួនបង្កើតមក ដើម្បីប្រមូលផ្តុំក្រុមមនុស្សខ្មែរ ទាំងឡាយណា ដែលចង់បាន តែផលប្រយោជន៏ផ្ទាល់ខ្លួន មិនគិតពីផលប្រយោជន៏ ប្រទេសជាតិ ឲ្យទៅបំបែក កំចាត់ កំទេច ក្រុមខ្មែរស្នេហាជាតិ ដែលមិនចេះ គិតពីផលប្រយោជន៏ផ្ទាល់ខ្លួន ក្នុងទិសដៅធ្វើយ៉ាងណា គ្រប់គ្រងប្រទេសកម្ពុជា ឲ្យបានទោះក្នុងរូបភាពណា ក៏ ដោយ ។ ត្រង់នេះ យើងអាចមើលឃើញយ៉ាងត្រឹមត្រូវបំផុត ដោយគ្រាន់តែ យើងយកអាយុលោក ហ៊ុន សែន មកប្រៀបធៀបជាមួយ កំណើត របស់ គណបក្ស ប្រជាជនកម្ពុជា ឃើញថា គណបក្សប្រជាជនកម្ពុជា មានអាយុជាង ៦០ឆ្នាំ ស្មើនឹងអាយុលោក ហ៊ុន សែន ទៅហើយ ។ អញ្ចឹងតាមសកម្មភាព ជាក់ស្តែង នឹងតាមព្រឹត្តិការណ៏ ប្រវត្តិសាស្រ្ត  វាប្រាកដណាស់ថា គណបក្ស ប្រជាជនកម្ពុជា ជាគណបក្សដែលយួន បង្កើតមក ដើម្បីលេបត្របាក់ ប្រទេស កម្ពុជា ដែលបត់បែនទៅតាមគ្រប់រូបភាព នៃការរីកចំរើន របស់ពិភពលោក ។

ប៉ុន្តែ ដោយសារ តែទឹកដី របស់ កម្ពុជា យើងជា ទឹកដី ដែលបាន ផ្តល់កំណើត ឲ្យ ប្រទេស ជិកខាង ទាំងឡាយ ទើប ធ្វើទឹកដី ដ៏ចំណាស់ មួយ នេះ មានកំណើត អ្នក ស្នេហាជាតិ កើត មាន ជាបន្ត បន្ទាប់ គ្រប់ជំនាន់ នៃកំណើត មនុស្ស យើង ទាំងឡាយ គ្រប់យុគសម័យទាំងអស់ ។ យ៉ាងណាមិញ នៅជំនាន់សម័យ សកលភាវូបនីកម្មនេះ គឺមានលោក ប្រធានសម រង្ស៊ី ដែលជាក្តីសង្ឃឹម តែមួយ គត់ សម្រាប់ប្រជាជាតិកម្ពុជាយើង ដោយ លោកប្រធាន សុខចិត្តលះបង់សេចក្តីសុខ ផ្ទាល់ខ្លួន ដើម្បីការពារប្រយោជន៏ ប្រជាជាតិកម្ពុជាទាំងមូល ។

យ៉ាងនេះហើយ ទើបគណបក្សយួន គេរៀបចំចាត់ចែងឲ្យមាន គណបក្សទាំងបីខាងលើនេះ ដើម្បីឲ្យមក ទប់កម្លាំង គណបក្ស សម រង្ស៊ី ដែលជាគណបក្ស តែមួយគត់ ក្នុងការដឹកនាំប្រជាជាតិកម្ពុជា ខាងមុខនេះ ។ រឿងដែលយើង និយាយថា គណបក្សទាំងបីនេះ ជាសាវ័ក របស់ គណបក្សប្រជាជនកម្ពុជា ព្រោះគ្រប់សកម្មភាពគណបក្ស ទាំងនេះ សុទ្ធជាសកម្មភាព របស់គណបក្សប្រជាជនកម្ពុជាទាំងអស់ ពិសេស នៅពេលបោះឆ្នោតជ្រើសរើស សមាជិកព្រឹទ្ធសភា ថ្មីៗនេះ  គឺថ្នាក់ដឹកនាំ របស់ គណបក្ស ហ៊្វុន ស៊ិន ប៉ិច និងគណបក្ស នរោត្តមរណឬទ្ធិ សុទ្ធតែបាន ឲ្យសញ្ញា បង្ខំសមាជិកក្រុមប្រឹក្សាឃុំ សង្កាត់របស់ខ្លួន បោះឆ្នោតឲ្យ គណបក្ស ប្រជាជន កម្ពុជា រីឯថ្នាក់ដឹកនាំ របស់គណបក្ស សិទ្ធិមនុស្ស លោក កឹម សុខា វិញ បានចេញធ្វើសកម្មភាពយ៉ាងខ្លាំង ទៅអូសទាញសមាជិក ក្រុមប្រឹក្សាឃុំ សង្កាត់ របស់គណបក្ស សម រង្ស៊ី ទៅបោះឆ្នោតឲ្យគណបក្ស ប្រជាជនកម្ពុជា ។ តើសកម្មភាព ទាំងនេះ មិនថាជាសកម្មភាព របស់គណបក្សប្រជាជនកម្ពុជា ??? ។ ដូច្នេះ សកម្មភាពនេះវាច្បាស់ណាស់ថា គណបក្សទាំងបីនេះ ពិតជាសាវ័ក របស់ គណបក្ស ប្រជាជនកម្ពុជា យ៉ាងពិតប្រាកដ ៕

សួស្តី មិត្តអ្នកអាន ជាទីនឹករលឹក !!!

មួយរយៈកន្លងទៅនេះ ខ្ញុំបានខកខានក្នុងការសរសេរអត្ថបទ ចុះផ្សាយ ក៏ដោយសារតែខ្ញុំបានសំរាកកាយ និងបានទៅសួរសុខទុក្ខអ្នកម្តាយ ជាទីគោរព បំផុតរបស់ខ្ញុំ នៅស្រុកបូរីជលសារ ខេត្តតាកែវ ដែលជាខេត្ត ដែលខ្ញុំបានឃ្លាតឆ្ងាយ អស់រយៈជាង ២០ឆ្នាំមកហើយ ។

ចាប់ពីថ្ងៃនេះទៅ ខ្ញុំនឹងចាប់ផ្តើមសរសេរឡើងវិញ ជាបន្តទៀតដូចសព្វមួយដងអញ្ចឹង ដូច្នេះសូមមិត្តអ្នកអាន ទាំងអស់ មេត្តា ជួយធ្វើការបន្តគាំទ្រ និងជួយកែតម្រូវដល់ខ្ញុំ ដោយអនុគ្រោះ ៕